И потомъ нѣкто прозвитерь, именемъ Арии, нача хулы дѣати на Сына Божиа и называти тварию. Царь же Костантинъ събра вселенскии съборь въ градѣ Никеи, святыхъ отецъ 318, въ нихъ же бѣ старѣиша собору Сильвестръ, папа Римскыи, Александръ, патриархь Царяграда, Витъ и Викентие и Макарии отъ Ерусалима, и Увеналии отъ Египта, и Николае отъ Миръ, и Спиридонъ Тримифиискии, и отврьгли Ариа еретика, и прокляша и единомыслении его, и утвердиша православную вѣру христианскую, и оттолѣ нача простиратися вѣра христианьская. И на томъ съборѣ изложиша исповѣдание православныа вѣры: Вѣрую въ единого Бога. Умре же Костантинь царь великии, звѣздѣ провозвѣстивши смерть его, отравлень навѣтомь братии своеа, дѣтеи Феодориныхь, сыи лѣтъ 65; остави же 3 сыны своа: Консту, и Констатиа и Константа; въ Римѣ остави Консту, а въ Новѣмь Римѣ Константиа, въ Антиохии же Костанта. По Костантинѣ же царствова сынь его Костантии; тѣмъ избыенымъ на ратехь своимь неустроениемь. По Костантии же царствова Иулиань Законопреступникъ, иже на христианы велико томление показа и многыа мученикы сътворы, въ нихъ же великоименныи Артемии, дука Александрыискыи, и иныи мнозии. При томъ бысть Василии Великии и Григории Богословъ. По Иулианѣ же царствова Иулии, таже Гратиань. По Гратианѣ же Иуалентъ, потомъ Великии Феодосии, православныи; по немъ Аркадии, сынь его. При семъ бысть великыи Златоустъ. По Аркадии же царствова сынь его Феодосии Юнныи, глаголемыи доброписецъ, иже крести его великии Златоустъ. Отъ 1-го же събора до втораго лѣтъ 60. Бысть же съи съборь въ Костантинѣградѣ, при велицѣмъ цари Феодосии, святыхь отецъ 150, на Македониа духоборца ; а патриархь Нектарии, и Богословъ Григории отъ Нанзианза и Григории Нисскии. А отъ втораго събора до третиаго лѣть 50. Съи святыи третии съборь бысть во Ефесѣ, при цари Феодосии Юннѣмь, святыхъ отецъ 200, а патриархь Кирилъ Александрьскыи, на Несториа злочтиваго, патриарха бывша Царяграда, человѣкослужебника. Отъ третиаго же събора до четвертаго лѣть 10. Съи святыи четвертыи съборь бысть при Маркианѣ цари, въ Халкидонѣ, а патриархь былъ Анатолии Константинаграда, на Диоскора, и Еитихиа и Севгира, а святыхъ отецъ 630. Отъ четвертаго же събора до пятаго лѣтъ 100. Съи бысть святыи пятыи съборъ при велицѣмъ цари Иустинианѣ, въ Цариградѣ второе, святыхь отецъ 165, а патриархь Константиняграда Евтихие, на суемысленаго Оригена. Отъ пятаго же сьбора до шестаго лѣть 130. Съи бысть святыи шестыи сьборъ при цари Костантинѣ Брадатѣмь, вь Цариградѣ третие, святыхъ отецъ 170, а патриархь былъ Константиняграда Георгие, на Сергиа, и Пυра и Макариа. Отъ шестаго же събора до седмаго лѣть 122. Съи святыи седмыи съборъ бысть при цари Константинѣ, сынѣ Леоновѣ, и матери его Иринѣ, второе въ Никеи, въ 11 октобра, святыхъ отецъ 367, а патриархь былъ Тарасии Царяграда; събравшеся на отмѣтающихся поклонениа святыхь иконь. Въ то время бысть притча сицева: азь есмь Анаскаридъ, жрець бога Аполона, вѣмъ, что не то Богъ истинныи, но то Богъ, иже родится отъ пречистыа дѣвици Мариама, да вѣрую въ онь; солнце видиши мя паки и узриши мя при цари Костантинѣ и Иринѣ. И събысться пророчьство его за полторы тысящи лѣтъ. Въ Костантинѣградѣ начаша здати храмъ Святаа Святыхъ, и во подошвѣ обрѣли гробь; въ гробѣ на прьстни золотѣ написано пророчьство его. При Костантинѣ цари и матери его Иринѣ благовѣрное чаание начатъ бывати, и судъ приати начало съ дрьзновениемъ, и слову Божию разширятися, и манастыремъ съ всею тишиною съзидатися. Въ долнихъ же стѣнахъ, рекше притвори Фракиискаа, человѣкъ нѣкии, копаа, обрѣте раку написану: Христосъ хощетъ родитися изъ Мариа Дѣвы, и вѣрую въ онь; при Костантинѣ же и Иринѣ, при правовѣрныхъ царъ, о солнце, паки мя узриши. А отъ седмаго събора до преложениа священнихъ книгъ отъ Грекь на Словенскии языкь святымъ Кириломъ философомъ лѣтъ 77. Купно же отъ Адама до Христа 5505 лѣтъ. А отъ Христа до Михаила благочестиваго царя лѣть 856. А отъ Михаила до крещениа Болгарскиа земля лѣтъ 17. А отъ крещениа Болгаръского до преложениа книгь на Словеньскии языкъ лѣть 22. А отъ преложениа книгь до крещениа Русскиа земли лѣтъ 78. Купно же отъ Адама до крещениа Руского лѣтъ 6496. А до Михаила отъ Адама лѣть 6360.

О ПРЕНЕСЕНИИ МОЩЕМЪ ЧЮДОТВОРЦА НЫКОЛЫ ОТЪ МИРЪ ВЪ БАРЪ ГРАДЪ, въ лѣто 6596 [1088], мѣсяца маиа въ 9 день. Присно убо длъжны есми, братие, праздникы Божиа въ честь дрьжаты, подобити же ся святымъ его, и подвижно искати спасениа, присно испытавши ся, како по образу Божию сътворены быхомъ, угоднаа предъ нимъ сътворше, якоже блаженныи сътвори, великии и словущии архиепископь Христовь Николае, егоже трапезы нынѣ хощу вамь представити, отъ неаже вькусите и видите, яко благь Господь. Благъ Господь уповающимъ на нь, благь Господь надѣющимся на нь, благь Господь любящимъ его, благь Господь творящимъ волю его, иже бѣ далъ Мирьскому граду и области ихъ, своа щедроты излиа на ня, и чюдеса творя дивнаа, исцѣлениа неоскуднаа даа, сущимъ въ напастехъ велии помощникь и заступникь показася по суху же и по морю, болныа исцѣляа, плѣнныа избавляа, слѣпымъ прозрѣние даа, хромымъ хождение, глухымъ слышати, прокаженыа очищаа, бѣсы изгоняа, и всѣмъ всякъ, якоже рече Господь: "Вѣруаи въ мя, дѣла, яже азъ творю, и тои сътворить; якоже и сии угодникь его, святыи архиереи великии Николае. Егда же благоволи благодать, и человѣколюбие въсиа на ны, праведному солнцу въсиаты на ны и благодати отъ Владыкы Вседрьжителя, показа имъ въ нынѣшнея времена, въ дни и въ лѣта наша, и въ нашу память, чюдо преславно и паче ума человѣка о преподобнѣмъ велицѣмь архиереи святымъ Николою. Въ тысущное и вь 9-десять 6-е лѣто отъ въплощения самого Бога еже вь человѣцѣхь отъ браконеискусомужныа приснодѣвы Богородица Мариа, при цари Гречестѣмь Алексеи Комнинѣ, при патриарсѣ Николѣ Константинаграда, въ лѣта рускыхь князеи, христолюбиваго великаго князя Всеволода Ярославича, въ Киевѣ, и благороднаго сына его, Владимера Манамаха, въ Черниговѣ, въ лѣто отъ сьздания мира 6596 [1088], судомъ убо Божиимъ и промысломь Вышняго, нашедшимъ Измалтяномъ на Греческую область об ону страну моря, отъ Корсуня поля наченше даже и до Антиохиа и до Иерусалима, по всѣмъ градомъ и селомъ ихь вся люди сущаа изсѣкоша, и жены ихъ и чада ихъ плѣниша, имѣние ихъ и домы пожгоша, церкви же и манастыря опустѣша, и грады ихъ приаша вь область свою; тогда же и Лукии сьтвориша пусть, въ немже лежа тѣло святаго Николы, тѣло драгое, тѣло всечестное, тѣло чюдеса дѣа дивнаа и преславная. Не можаше ли убо преподобныи съи мужъ, дабы градъ его и церкви не опустѣла? Но повелѣнию Божию не противяся, но глаголаше: "Господи, угоднаа предъ очима твоима сътворю. Якоже и бысть. Не можааше угодника своего Господь нашь Исусъ Христосъ зрѣти на пустѣ мѣстѣ лежаща мощемъ его и ни отъ кого же славимымъ, но якоже есть писано: прославляющихъ мя, рече, прославлю, и о мнѣ хвалящихся възнесу славу ихь". Бысть убо въ дни сиа прозвитерь благовѣренъ въ Барѣ градѣ, Нѣмеческыа области, христолюбивъ же и праведень, сему явися святыи Николае, глаголя: «Иди и рци людемъ симь и всему сьбору церковному, яко да шедше възмутъ мя отъ Мирскаго града и здѣ положатъ мя, не могу тамо пребывати на пустѣ, Богу тако изволшу», и то рекь отъиде. Утру же бывшу, абие воста прозвитерь, и повѣда всѣмь людемъ бывшее явление святымъ Николою. Си же слышавше, и възрадовашася радостию великою, и глаголаху: «Днесь възвеличилъ есть Господь милость свою на людехъ своихь и на градѣ нашемъ, яко сподобиль ны есть приати угодника его святаго Николу». И ту тако нарядиша мужа благоговѣнны, боящася Бога, въ трехъ кораблехъ ити по святаго. Оны же насыпавше пшеници, творящеся въ куплю, отъидоша, и приидошавъ Антиохию, и спродавше жито, и всю куплю искупивше имъ, что имъ угодно бѣ. Вѣсть же приемше Баряне, яко Венидици ту сущии хотятъ ити прежде ихь и взяти мощи святаго Николы, ускориша Баряне, и отъидоша абие, и приидоша въ Ликию градъ Мирскыи, и присташа въ лимени градстѣмь. Съвѣтъ же сътворше, въземше оружиа внидоша въ церковь святаго Николы, и обрѣтоша въ неи 4 черноризци, и въпросиша ихъ, где лежитъ святыи Николае? И показаша имъ гробъ, идеже лежаше святыи Николае. Они же раскопавше помость церковныи, обрѣтоша раку полну мира, и волиаша миро въ корчагы, а мощи его взяша сь радостию, и несоша ̀и вь корабль свои, и отплуша въ море. Два черньца остаста вь Мирѣхъ, а два идоста съ мощми святаго Николы; и приидоша вь Барь градъ об ону страну моря. Отъидоша отъ Мирскаго града мѣсяца априля вь 11 день, и приидоша въ Баръ градъ мѣсяца маиа 2 день, вь недѣлю, въ годину вечернюю. Видѣвше же баряне, яко приидоша съ мощми святаго Николы отъ Мурь, и изыидоша вси баряне вь стрѣтение его, мужи и жены, и отъ мала и до велика, съсвѣщами и темианомъ, и приаша съ радостию, съ великою честию, и положиша ы въ церкви святаго Иоанна Предтеча при мори. Да послушаите, братиа моа, молю вы, колико чюдесъ сътвори святыи Николае дошедъ града Барска. Въ недѣлю бо вечерь прииде, а заутра вь понедѣлникь исцѣли 40 и 7 болныхь, мужъ и жень, одръжимыхъ различными недугы и болѣзньми: онь главою, а другыи очима, инь рукама и ногама, а другыи сердцемь, или чревною болестию, и всѣмъ тѣломь страждущихъ отъ духь нечистыхъ; а въ вторникь исцѣли 20 и 2 болныхъ, а въ среду исцѣли 29 болящихъ; вь четвертокь, заутра рано, глуха и нѣма суща, имуща уже 5 лѣть въ недузѣ томъ. И посемь явися святыи Николае нѣкоему черноризцу духовну сущу, глаголя тако: «Волею Божиею приидохомъ къ вамъ въ страну сию». Въ день недѣлныи, въ часъ 9, приаша исцѣления 11 человѣкь. Еще же пакы творить по вся дни чюдеса святыи Николае, яко источникъ кыпяи и копца не имыи. Многа же дааниа приношааху кь святому: злато, и сребро и рызы многоцѣнны. Видѣвше же гражане преславная его чюдеса, възрадовашася радостию великою зѣло, и създаша ему церковь преславну, и велику и красну сущу, въ имя святаго преподобнаго отца нашего Николы, сковаша и раку ему сребрену и позлащену. Въ 3-е лѣто пренесениа его отъ Мурь послашася къ Римьскому папѣ Герману, яко да приидетъ сь своими епископы и со всѣмь церковнымъ его клиросомъ, и да принесутъ мощи святаго Николы; и вложиша въ раку сребряну, и вземше епископи съ велможами ихъ , и принесоша въ новую и великую церковь его, и полояжиша въ олтари въ сокровнѣ мѣстѣ, мѣсяца мая въ 2 день; принесоша же и ветхии гробь его, въ немь же бѣ принесень отъ Муръ, и поставиша въ церкви, положиша и кость рукы его отъ мощеи его; многь народъ, людии приходящии поклоняхуся, цѣлующе мощеи его раку. Римскыи же папѣжь Германь, и епископъ, и вси гражане и людие праздникъ великь сътвориша вь тои день на похвалу святому, юже творятъ и до сего дне, и ядоша, и пиша и веселишися въ тыи дни, многа даания даша убогымъ, и тако отъидоша во домы своа съ миромъ, славяще и хваляще Бога и святаго и праведного угодника его Николу. Намъ же, о преблаженне угодниче Христовъ, милостивь буди здѣ и въ будущемъ вѣцѣ; на тя бо уповахомъ и молимся, ты бо всѣхь видимыхъ и невидимыхь честнѣи явися. Блажень по истиннѣ градъ Барскыи и церкви его, въ неи же тя възвеличи Господь Богь, освящень вь правду, освяти бо тя угодника своего Вышнии. Ты бо всѣмъ христианомъ еси помощникь и заступникь, избавляа ны отъ всѣхъ напастии, отъ бѣдъ нашихъ. И еще молимъ ти ся, святыи преблаженныи угодниче святителю Христовь Николае, имаши дрьзновение кь Владьщѣ молити о насъ, празднующихъ выну память твою, творящихъ пренесение твоихъ честныхъ мощии, яко да спасени будемъ твоими молитвами, благодатию и человѣколюбиемь Господа нашего Исуса Христа, емуже купно подобаетъ слава, и честь, и покланение и велелѣпие съ безначалниымъ его Отцемъ, и пресвятымъ и благымъ и животворящимъ Духомъ, нынѣ и въ некончаемыа вѣкы, аминь.